祝賀萬里達車行「老臣子」昌哥及三哥榮休！

祝賀萬里達車行「老臣子」昌哥及三哥榮休！

 



      5月30日晚，香港Yamaha代理「萬里達車行」搞咗一場好有意義嘅晚宴，歡送兩位陪住車行度過半世紀歲月嘅重量級人物--昌哥及三哥光榮退休。呢晚唔單止係兩位前輩告別職場嘅聚會，仲係本地電單車界一次充滿人情味嘅歲月見證。

幕後功臣：維修部元老昌哥

      講起昌哥，絕對係萬里達維修部嘅「元老級」大師傅。佢喺車行做咗超過五十年，維修經驗有幾豐富真係唔使多講。筆者由九十年代入行到依家，但駕駛電單車就識昌哥都超過四十年啦。呢幾十年嚟，我親眼見證住佢喺背後默默耕耘，用一對巧手同精湛技術支援車隊，幫車手贏咗一個又一個嘅賽事冠軍。

      昌哥唔單止係Yamaha呢個品牌喺香港嘅堅實後盾，多年嚟仲無私咁教識咗無數獨當一面嘅電單車技師。佢對本地電單車維修界嘅付出及傳承，貢獻絕對係無可取代。

希雲街嘅集體回憶：零件部主管三哥

      晚宴嘅另一位主角，就係零件部主管三哥。筆者同佢識咗都接近四十年，不過自從萬里達零件部由銅鑼灣希雲街舊址搬走咗之後，大家見面嘅機會確實少咗。

      雖然好耐無見，但三哥佢依然精神奕奕、笑容滿面，身體仲非常之硬朗，真係覺得好欣慰。三哥咁多年嚟喺零件部把關，同樣係車行順利運作嘅一大功臣。

致敬半世紀嘅匠人精神

      兩位前輩將人生最寶貴嘅五十幾年青春，全心全意奉獻畀同一間公司，呢份堅持及匠人精神喺今時今日嘅社會真係好難得。萬里達車行可以有咁忠心又優秀嘅伙記，絕對係勞資雙方多年嚟互相交心、建立深厚感情嘅最佳證明。

      喺度，筆者衷心祝願昌哥及三哥退休之後生活美滿，好好享受悠閒嘅人生新一頁。同時都祝萬里達車行未來愈做愈好，團隊上下一心；本刊祝各位讀者同業事事順利，身體健康！