聯絡我們@FB 
先講講筆者嘅前設處境，雖擁有數輛電單車，但絕大多數係引擎250c.c.或以下嘅車款，有二衝程車、有古董綿羊，亦有現代化綿羊。由於即將搬屋，新居出入市區必須行經高速公路，現時擁有嘅車輛上高速公路會好飄又乏力，冇理由駕駛250c.c.二衝車喺日常代步吧(你明嘅)，所以就萌起入手大c.c.羊作為代步嘅念頭。
電動風擋一鍵變型
自Yamaha嘅TMAX成功出位後，被稱為「跑羊」或「大羊」嘅大c.c.綿羊真係越出越多，講到底就係因為有中重型街車嘅噸位，又有一定嘅性能表現，滿足得到用家嘅日常使用方便性，又可以間中放肆一下。筆者都知TMAX有口皆碑，但正因為太好賣，一街都係，再加上對比Honda嘅「大羊」，後者嘅車款選擇性似乎更多，配喺新車上嘅gimmick系統亦更多，所以筆者偏向喺Honda陣營內「揀羊」。
Forza一直都係Honda嘅主力車系，但以中小型車款為主，Forza 750用上X-ADV 750嘅相同性能規格，一舉提升至「跑羊」定位。老實講，一推出已令筆者身邊嘅「跑羊迷」大表興趣，今次2025年版本可以話係一個facelift版。外表作出更多升級，成份車頭都變咗，一體化頭燈首次將指揮燈都融會到日光燈之內，而且車頭及車身增加唔少導風槽，一來更有型，二來應可理順車頭嘅亂流，有利減低風阻。
另一樣非常吸引嘅新設備，就係新增可以電動升降嘅風檔，真係功得無量！全因2021年版嘅風檔高度有120mm，對於部份騎仕嚟講可能過高，曾經聽過有用家忍唔住自行更換較矮嘅風檔，令外觀更有型。不過自己cut風檔始終比較麻煩又唔靈活，而今次新版嘅電動風檔最高位置有120mm，闊度增加25%，即係話用家高速行車有更好擋風效果，想有型啲都可以隨時撳一個掣降低佢，行緊車都得，呢一點最正！
定速巡航好使好用
睇到Forza 750兩代都用到120mm高風檔，今代更加大size，就知廠方刻意將Forza 750打造成巡航大羊。既自命係巡航大羊，又點可以冇定速巡航系統？所以今代喺油門旁邊新增咗定速巡航系統嘅開關，對於經常喺市內開開停停嘅用家可能作用唔大，但筆者搬新居後經常出入highway，動輒每程車都要開50公里，有咗呢個系統真係減少精神負擔。
由於用上745c.c.水冷四衝程雙缸引擎，令Forza 750可以輸出58.6ps馬力，比對手Yamaha TMAX足足多出11ps馬力，可想而知佢嘅尾段加速有幾強橫。而且筆者睇上佢仲有一個重要原因，就係Honda自家嘅DCT雙極力子6速波箱，引擎同波箱緊湊地置於車體中央，再利用街車一樣嘅金屬鍊條傳動，有別於傳統綿羊嘅傳動方式。用家可以利用右手切換自動/手動模式，以及空波，再隨時利用左手食指上波、左手姆指落波，反應之快連駕開棍波嘅人都未必及得上，而且DCT波箱轉波真係有如棍波車段速分明，好啱筆者一類喜歡間中「百厭」一下嘅用家。此外，針對DCT波箱轉波特性，廠方都優化咗極力子，令慢速行車時有更順暢表現，喺塞車或掉頭時更有信心。
乘坐舒適輕鬆
新款Forza 750都用上新設計嘅5英吋儀錶板介面，比上代更清晰易讀，而且保留馬力輸出模式選擇，分別有標準、運動、雨天，同埋兩個自訂模式，用家可因應個人喜好同實際需要選擇，喺錶板上都有非常清晰嘅波檔同馬力模式顯示。前文提到Honda為Forza 750增添定速巡航系統，就係想用家駕駛得更舒適，廠方今次新版當然保留咗Keyless無車匙啟動系統，方便用家只需袋住車匙就可以著車外，連座位都作出些微修改，提升承托力更適合長途駕駛，大大減少用家嘅疲勞，就算座高仍維持喺790mm，用家雙腳著地亦都更輕鬆，泊車或慢車都更有信心，啱晒泊街嘅筆者使用。
總結
講到尾，筆者覺得最新款Forza 750絕對係完全合心水嘅車款，要馬力有馬力、要高科技有高科技、要玩味有玩味。不過由於搵個就近有蓋月租車位難過登天，預料都係泊街，買新車實在有啲唔捨得佢吹風飲露，所以我都係等佢有二手車出現先再入手。「Forza 750，等我呀！」
2025 Honda Forza 750規格表
全長：2,200mm
全闊：790mm
全高：1,480mm
軸距：1,580mm
座高：790mm
最低離地距︰135mm
濕重：236kg
油箱容量：13.2L
引擎：水冷四衝程並列兩汽缸SOHC 8氣門
缸徑X行程：77.0 x 80.0mm
容積：745c.c.
壓縮比：10.7:1
最大馬力：58.6ps/6,750rpm
最大扭力：7.03kg-m/4,750rpm
供油系統：PGM-FI
點火：電子
起動：電動
驅動模式：鍊條
離合器/波箱：濕式多片6前速
前傾角：27度
拖曳距：104mm
機油容量：1.7L
耗油量：每公升行走31km/l(均速60公里)
回轉半徑：2.8m
車架︰鑽石形鋼管
碳排量︰85g/km
噪音水平︰87.2dB
前懸掛系統：41mm倒立前避震,行程120mm
後懸掛系統：單筒油壓油壓彈簧,行程120mm
前制動系統：310mm雙鑽孔碟配四活塞卡鉗,ABS
後制動系統：240mm單碟配單活塞卡鉗,ABS
前輪框︰多輻式鋁合金17M/C x MT3.50
後輪框︰多輻式鋁合金15M/C x MT4.50
前輪胎：120/70-R17M/C(58H)
後輪胎︰160/60-R15M//C(67H)
