2025 Ducati Panigale V4S

2025 Ducati Panigale V4S

      人人都話自己揸部Super Bike，又係咪真係部部都咁Super？先唔講車手技術如何，就以車本身嚟比較，邊間車廠近年喺MotoGP最堅？我話最堅係Ducati，相信冇人唱反調吧？因為事實擺在眼前，Ducati正處於無敵狀態，旗下戰車比對手高班係鐵一般嘅事實，連帶市販型號都戰力大躍進，就好似最新推出嘅Panigale V4S，雖然已處於頂班位置，但Ducati仍然為佢進行大改革，就係為咗保持皇者地位。

新款包圍有利極速
      車廠參加頂級MotoGP賽事，一來係為咗增加名譽，二來就係將最新嘅科技應用喺賽場，為日後民用化鋪路。最新一代Panigale V4S就係Ducati車廠將最新賽車技術民用化嘅平台，亦可以話係目前最接近MotoGP純種賽車嘅民用車。根據以往經驗，一款車如果有非常好嘅成績，車廠好少大膽作出重大改變，因為怕改變太大，導致表現有好大落差，但Ducati就係對新Panigale V4S充滿信心，先唔講見唔到嘅電子系統，甚至連外觀都有好大改動。先睇車頭，頭燈形狀比以往扁平，兩側嘅雙層定翼改成同車身色，同埋稍向前移，與新嘅尖銳車頭連成一體，作用就係有更好破風效果同高速穩定性。此外，全車包圍都重新設計，將更多空氣導入車體增加冷卻效能，又可以減低風阻多達4%，直接提升極速表現。

減少剛性增加柔韌
      心水清嘅車迷，第一眼望到新款Panigale V4S，就會發覺新車最大改動未算係車頭，車尾先至係翻天覆地大轉變。尾輪竟然取消十分受車主喜愛的單邊搖臂，而出現消失已久嘅雙搖臂式設計，而且兩邊搖臂都非常粗壯，再喺中間偷出空間進一步減輕了重量，廠方稱呢款新式雙搖臂為「Hollow Symmetrical Swingarm」，係多年MotoGP實戰下得出最新嘅研究成果。

      今代雙搖臂嘅最大好處並非只是一味靠硬，而是由全新中空對稱雙搖臂配合前Monocoque鋁合金車架，兩者都比上代輕咗2.68kg及0.73kg，實現越輕越快嘅道理。今次新車架同新尾搖臂有一個共同特性，就係廠方刻意減低車架同搖臂嘅橫向剛性，前者減少40%，後者減少37%。

      可能有人會奇怪：「乜唔係越硬越好咩？」世事無絕對嘅，車廠人員研究同車手實戰回饋都話，車架同搖臂太硬，反而影響操控，全因路面嘅凹凸不平會唔經過濾傳到車上，行車會變得彈跳，尤其車尾如果太過彈跳，會嚴重影響操控同安全性，連加速表現都會削弱。所以車架同搖臂有適量柔韌度，除可以減少車手嘅體力消耗，同埋減少懸掛系統負擔外，仲可以令行車時更貼服，人與車有更強溝通。







三款鈦喉交響樂
      新款Panigale V4S仍沿用一台水冷四衝Desmosedici Stradale 90度V4引擎，都有作出優化，不過唔係輸出方面，而係廢排方面已符合更嚴苛嘅Euro5+，原裝車可輸出216ps/13,500rpm馬力(其實比上代多咗0.5ps)及12.33kg-m/11,250rpm扭力。車主其實只需喺買車時選購唔同嘅Akrapociv鈦合金喉，分別有原裝位置及升到車尾版本，就可以得出增大馬力效果，分別升級至224ps或228ps，聲浪亦都有好大分別，建議落場先好用，以免同街坊傷感情。







      Panigale V4S與V4兩個版本同時推出，外觀上雖然十分相似，但其實用料有別，V4S可以話全車極盡奢華，目的就係想有更強嘅表現及更輕巧車身。V4標準版配比較普通嘅Showa頭fork、Sachs尾吸震筒及Sachs Damper，而V4S就用第三代電控Ohlins NPX-30倒fork、Ohlins TTX尾吸震筒及Ohlins Damper，可以輕鬆利用電控裝置設定，保證精準細緻，對於高手嚟講可以話係如虎添翼。

      唔想吓吓都玩到咁專業、輕輕鬆鬆設定又可唔可以？只需要喺五個馬力輸出模式中作出選擇，唔單只引擎輸出及電子輔助安全系統會自動調節，V4S版本嘅Ohlins避震系統都會自動適應調節。V4標準版配用合金輪框，而V4S就用咗MotoGP賽車技術嘅鍛造鋁合金輪框，前後輪分別只重2.95kg同4.15kg，大大減低滾動慣性，可以令加速更快及有更靈活轉向反應，甚至連煞車距離都可以縮短！








      講到煞車方面，Panigale V4S竟用上Brembo最新發佈嘅HypureTM制動卡鉗，對比起上代採用嘅Brembo Stylema制動卡鉗，每對輕咗30g，最重要係散熱更快，即係代表極端煞車效能得到提升。最後不得不提，Ducati為新款Panigale V4S配上全新「Race eCBS」(賽車電子聯動煞車系統)，呢套系統由Ducati聯同Bosch共同開發，可以模擬出職業級賽車手嘅後煞車過彎技巧，用家只需彎前用前煞車掣，就可以聯動後煞車，系統會收集全車數據控制後煞車，作出最快入彎及出彎嘅相對速度，令一般高手都可以輕鬆做出職業級車手嘅完美過彎動作。